సాఫ్ట్‌వేర్ దిగ్గజ సంస్థ గూగుల్‌కు చెందిన యూట్యూబ్ ఈ ఏడాది జూన్ నుంచి ఇప్పటి వరకు తన సైట్‌లో 1 లక్ష వీడియోలను తొలగించినట్లు ఒక ప్రకటనలో తెలిపింది. 17వేలకు పైగా చానల్స్‌లో నిబంధనలకు విరుద్ధంగా ఉన్న సదరు వీడియోలను తొలగించామని యూట్యూబ్ తెలిపింది. కాగా ఆ వీడియోలు ఎక్కువగా ఇతరుల మనోభావాలను కించ పరిచే విధంగా ఉన్నాయని, అందుకనే వాటిని తొలగించామని ఆ సంస్థ తెలియజేసింది.
ఇక ఏప్రిల్-జూన్ మధ్య కాలంలో మొత్తం 90 లక్షలకు పైగా వీడియోలను, 40 లక్షలకు పైగా యూట్యూబ్ అకౌంట్లను తొలగించామని కూడా ఆ సంస్థ తెలిపింది. వాటిలో చాలా వరకు స్పాం కేటగిరీకి చెందిన వీడియోలు ఉన్నాయని, అనేక వీడియోలు వీక్షకులను తప్పుదోవ పట్టించే స్కాం విభాగానికి చెందినవిగా కూడా ఉన్నాయని ఆ సంస్థ పేర్కొంది. అందుకనే వాటిలో చాలా వరకు వీడియోలను ఒక్కరు కూడా వీక్షించకముందే యూట్యూబ్ నుంచి తొలగించామని ఆ సంస్థ తెలియజేసింది. ఇకపై కూడా తమ పాలసీలను మరింత కఠినంగా అమలు చేస్తామని, యూట్యూబ్‌లో యూజర్లు అప్‌లోడ్ చేసే వీడియోలను పరిశీలించేందుకు 10వేల మంది ఉద్యోగులు పనిచేస్తున్నారని గూగుల్ తెలిపింది.
