సాఫ్ట్‌వేర్ దిగ్గజ సంస్థ గూగుల్ తన నూతన ఆండ్రాయిడ్ ఆపరేటింగ్ సిస్టమ్ ఆండ్రాయిడ్ 10ను విడుదల చేసింది. ఇక దీనికి గత ఆండ్రాయిడ్ ఓఎస్‌ల మాదిరిగా ఎలాంటి పేరు పెట్టడం లేదని, కేవలం వెర్షన్ నంబర్ మాత్రమే ఉంటుందని గూగుల్ ఇటీవలే ప్రకటించింది. ఈ క్రమంలోనే ఈ నూతన ఆండ్రాయిడ్ ఓఎస్‌ను గూగుల్ ఇవాళ విడుదల చేసింది. 

ఆండ్రాయిడ్ 10 అప్‌డేట్ ప్రస్తుతం గూగుల్‌కు చెందిన పిక్సల్, పిక్సల్ ఎక్స్‌ఎల్, పిక్సల్ 2, పిక్స్ 2 ఎక్స్‌ఎల్, పిక్సల్ 3, పిక్సల్ 3 ఎక్స్‌ఎల్, పిక్సల్ 3ఎ, పిక్సల్ 3ఎ ఎక్స్‌ఎల్ ఫోన్లతోపాటు ఎసెన్షియల్ ఫోన్‌కు కూడా అందుబాటులో ఉంది. ఇక మిగిలిన స్మార్ట్‌ఫోన్ కంపెనీలు కూడా ఈ నూతన ఓఎస్‌ను త్వరలోనే తమ తమ ఫోన్లలో అందుబాటులోకి తేనున్నాయి. కాగా ఆండ్రాయిడ్ 10లో నూతనంగా అందిస్తున్న పలు టాప్ ఫీచర్ల గురించి ఇప్పుడు తెలుసుకుందాం. 

• లైవ్ క్యాప్షన్ - యూట్యూబ్‌లో ఉన్న క్యాప్షన్స్ ఫీచర్‌ను ఇతర యాప్‌లలోనూ వాడుకునేలా ఆండ్రాయిడ్ 10ను తీర్చిదిద్దారు. ఇకపై ఆండ్రాయిడ్ 10లో ఇతర యాప్‌లలో ప్లే చేసే వీడియో, ఆడియోలకు లైవ్ క్యాప్షన్లు వస్తాయి. 

* స్మార్ట్ రిప్లై - ఆండ్రాయిడ్ 10లో మెసేజెస్‌కు సజెస్టెడ్ రెస్పాన్స్‌లను అందిస్తున్నారు. అంటే.. మీకు వచ్చే మెసేజ్‌లకు అనుగుణంగా మెసేజ్ టైపింగ్ బాక్స్‌లో పలు సజెషన్ మెసేజెస్ చూపించబడతాయి. వాటిల్లో మీకు కావల్సిన మెసేజ్‌ను ఎంచుకుంటే అది ఆటోమేటిగ్గా అవతలి వారికి పంపబడుతుంది. దీంతో మీరు ఎలాంటి రిప్లై మెసేజ్‌లను టైప్ చేయాల్సిన అవసరం ఉండదు. 

* సౌండ్ ఆంప్లిఫైర్ - మీ చుట్టు పక్కల నుంచి ఉత్పన్నమయ్యే శబ్దాల తీవ్రతను తగ్గిస్తూ మీరు కాల్ మాట్లాడేటప్పుడు అవతలి వారికి స్పష్టంగా వినిపించేలా ఈ ఫీచర్‌ను ఆండ్రాయిడ్ 10లో తీర్చిదిద్దారు.

* గెస్చర్ నావిగేషన్ - ఆండ్రాయిడ్ 10లో గెస్చర్ నావిగేషన్ మోడ్ ఫీచర్‌ను అందిస్తున్నారు. దీంతో నావిగేషన్ బార్ ఏరియా పూర్తిగా మాయమవుతుంది. దానికి బదులుగా యూజర్లు గెస్చర్లతో ఫోన్‌ను ఆపరేట్ చేసుకోవాల్సి ఉంటుంది. దీంతో యూజర్లు ఫుల్ స్క్రీన్‌ను ఎక్స్‌పీరియెన్స్ చెందొచ్చు. 

* డార్క్ థీమ్ - ప్రస్తుతం డార్క్ థీమ్ అనేది కేవలం కొన్ని యాప్స్‌లో మాత్రమే అందుబాటులో ఉంది. అయితే ఆండ్రాయిడ్ 10లో సిస్టమ్ వైడ్ డార్క్ థీమ్‌ను అందిస్తున్నారు. అందువల్ల యూజర్లు ఫోన్‌లో ఏ యాప్‌ను ఓపెన్ చేసినా సరే.. దాన్ని డార్క్ థీమ్‌లో వీక్షించవచ్చు. ఈ క్రమంలో రాత్రి పూట ఈ థీమ్ వల్ల కళ్లపై ఒత్తిడి పడకుండా ఉంటుంది. అలాగే ఫోన్ బ్యాటరీ కూడా సేవ్ అవుతుంది. 

* ఫాస్టర్ సెక్యూరిటీ అప్‌డేట్స్ - ఇప్పటి వరకు స్మార్ట్‌ఫోన్ తయారీ కంపెనీలే ఆ ఫోన్లకు సెక్యూరిటీ అప్‌డేట్లను అందించేవి. కానీ ఆండ్రాయిడ్ 10లో అలా కాదు. యూజర్లు నేరుగా గూగుల్ ప్లే స్టోర్ నుంచే తమ ఫోన్‌కు గాను సెక్యూరిటీ అప్‌డేట్లను పొందవచ్చు. 

* ఫోకస్ మోడ్ - ప్రసుతం ఈ ఫీచర్ ఆండ్రాయిడ్ 10 బీటా వెర్షన్‌లో ఉంది. దీన్ని త్వరలోనే ఫైనల్ వెర్షన్‌లో ఇవ్వనున్నారు. ఈ ఫీచర్ వల్ల మీరు ఉన్న యాప్‌పైనే ఫోకస్ పెట్టవచ్చు. దీంతో ఇతర యాప్స్ నుంచి మీకు డిస్టర్బెన్స్ ఉండదు. 

* ఫ్యామిలీ లింక్ - ఇది తల్లిదండ్రులకు ఉపయోగపడుతుంది. తమ పిల్లలు ఆండ్రాయిడ్ డివైస్‌ను ఎంత సేపు ఉపయోగించాలి, అందులో నెట్‌ను ఎంత వాడుకోవాలి, ఏమేం చూడాలి అన్న అంశాలను ఈ ఫీచర్ ద్వారా కంట్రోల్ చేయవచ్చు.

* లొకేషన్ కంట్రోల్స్ - ఆండ్రాయిడ్ 10లో అందిస్తున్న మరొక అద్భుతమైన ఫీచర్ ఇదని చెప్పవచ్చు. దీని సహాయంతో యూజర్లు కేవలం నిర్దిష్టమైన యాప్‌ను ఉపయోగించినప్పుడు మాత్రమే లొకేషన్ ఆన్ అయ్యేలా సెట్ చేసుకోవచ్చు. దీంతో ఆ యాప్‌ను యూజర్ ఓపెన్ చేసినప్పడే ఆ యాప్ లొకేషన్‌ను ఉపయోగించుకుంటుంది. యాప్‌ను క్లోజ్ చేయగానే దానికి లొకేషన్ షేరింగ్ ఆగిపోతుంది. 

* ప్రైవసీ కంట్రోల్ - ఆండ్రాయిడ్ 10లో యూజర్లకు యాప్స్‌పై మరింత నియంత్రణ అందించారు. ఈ క్రమంలో యూజర్లు తమ తమ డివైస్‌లలో ఉండే యాప్స్‌కు ఎలాంటి పర్మిషన్లు ఇవ్వాలో నిర్ణయించుకోవచ్చు. యాప్స్‌కు పర్మిషన్లు ఇవ్వకుండా నియంత్రించవచ్చు కూడా. దీంతో యూజర్లకు మరింత ప్రైవసీ లభిస్తుంది.